Баялаг бүтээгчдийг дэмжих холбоо” Төрийн бус байгууллагаас /ТББ/ өнөөдөр мэдээлэл хийлээ. Жижиг, дунд үйлдвэрлэлийг хөгжүүлэх сангаас /ЖДҮ/ Капитал банк зээл авсан асуудалтай холбоотойгоор байр сууриа илэрхийлэв. Тус ТББ-ын тэргүүн Б.Батдэлгэр хэлэхдээ “Сангийн сайдын үүрэг гүйцэтгэгч, Хүнс хөдөө аж ахуйн сайдын үүрэг гүйцэтгэгч, Капитал банкны хамтарсан гурвалсан гэрээ надад байна. 2017 оны аравдугаар сарын 10-ны өдөр энэхүү гэрээг байгуулсан байдаг. 2011 оны зээлийн гэрээний үлдэгдэл 28 тэрбум төгрөг, 2018 оны гэрээний зээлийн үлдэгдэл 17 тэрбум төгрөг байна. Энэ хоёр гэрээний хуримтлагдсан алданги 2 тэрбум, нийлээд 48 тэрбум 447 сая төгрөгийг жилийн 7 хувийн хүүтэй, 3 жилийн хугацаатай, үндсэн төлбөрөөс нэг жил чөлөөлөгдөх эрхтэй, алданги нь 0.014 хувьтай гэрээ байгуулсан байгаа юм. Ж.Эрдэнэбатын Засгийн газар буухаасаа өмнө энэ гэрээг Капитал банктай хамтран байгуулжээ.Монгол Улсын Засгийн газар ЖДҮ-ийг хөгжүүлэх сангийн эргэн төлөгдөх ёстой 48 тэрбум төгрөгийг дамжуулан зээлдэгч болж төлөх эрх зүйн үндэс байгаа юм уу. Хэрэв энэ мөнгө цаг хугацаандаа ЖДҮ-ийг хөгжүүлэх санд орсон бол ЖДҮ эрхлэгчид олон ажлын байрыг нэмэгдүүлж, Монгол Улсад үйлдвэрлэлийг хөгжүүлэх байсан” гэлээ. Мөн тэрбээр УИХ-ын гишүүн Б.Ундармаа 99.98 хувийг нь эзэмшдэг Капитал банк яагаад ЖДҮ-ийг хөгжүүлэх сангаас авсан мөнгөө эргээд төлдөггүй юм бэ гэдэг асуудлыг ярилаа.
Сануулахад, тус ТББ-ын зүгээс / 2018.10.29/ мэдээлэл хийхдээ ЖДҮ-ийг хөгжүүлэх санд хөндлөнгийн аудит оруулж, өнгөрсөн 5 жилийн төсөл сонгон шалгаруулах үйл ажиллагаа үнэн зөв, шударга явагдсан эсэх талаар шалгалт хийж, үр дүнг олон нийтэд мэдээлэх шаардлагыг Ерөнхий сайдад хүргүүлж буйгаа мэдэгдэж байсан юм.
Сэтгэгдэл бичих