Иран улсад Covid-19 өвчнөөс үүдэлтэй нас баралт эрс нэмэгдсэнтэй холбоотойгоор өнгөрсөн бямба гарагаас эхлэн анх удаа бүх нийтийг хамарсан хөл хорионы дэглэм тогтоожээ. Урьдчилсан таамаглалаар хоногт бүртгэгдэх нас баралтын тоо хоёр дахин нэмэгдэж болзошгүй бөгөөд эмнэлгүүдийн хүчин чадал хүрэлцэхгүй байх магадлалтай аж.
Тус улсын Ерөнхийлөгч Хасан Роухани ‘Манай улсын Засгийн газарт энэ вирустэй тэмцэхэд хөл хорио тогтоохоос өөр гарц алга. Коронавирусийн гурав дахь давлагаатай тэмцэхийн тулд бүх нийтээрээ хамтран зүтгэх хэрэгтэй байна’ гэжээ.
Одоогоор хөл хорионы дэглэмийг мөрдөх нарийн заалтууд гаргаагүй ч хот, суурин болгон халдварын тархалтаас хамааран өөрсдийн дүрэм журмаар хязгаарлалт тогтоох гэнэ. Тус улсад хоёр долоо хоногийн хугацаанд нэг хотоос нөгөө рүү зорчихыг хориглох, хүнсний дэлгүүр, эмийн сангууд л ажиллах боломжтой юм байна. Цагдаагийн байгууллага болон Исламын хувьсгалт харуулын корпус хязгаарлалтын арга хэмжээний хэрэгжилтэд хяналт тавьж ажиллах гэнэ.
Өмнө нь Ираны эрх баригчид иргэд болон хувийн компаниуддаа санхүүгийн тусламж үзүүлэх боломжгүй байсан учраас хөл хорионы дэглэм тогтоох шийдэлд хүрч чадаагүй ажээ. Хөл хорио тогтоосноор тус улсын хүн амын хамгийн ядуу хэсэг нь өлсгөлөнд нэрвэгдэх магадлалтай гэж үзэж байсан юм. Гэвч эрүүл мэндийн байгууллагын мэргэжилтнүүд Ерөнхийлөгч Роуханийг ятгаж чаджээ. Ямар ч хязгаарлалт тогтоохгүй байснаар улс орноо бүр ч том гамшигт хүргэх эрсдэлтэй гэсэн байна.
Тус улсад коронавирусийн халдвар авсан 41 мянган хүн амиа алджээ. Аравдугаар сараас хойш хоногт 400 орчим хүн амиа алдаж байна. Эрх баригчид шинжилгээнд хамрагдаагүй ч нас барагсдын тоог нэмж тооцвол бодит тоо нь үүнээс гурав дахин өндөр байх магадлалтай гэжээ.
Эх сурвалж: ВВС
Сэтгэгдэл бичих