Сүүлийн гурван жилд насан хүрээгүй хүүхэд машин барьж осол гаргасан 24 хэргийг шүүхэд шилжүүлжээ. Ослын улмаас 27 хүн хохирсноос зургаан хүн нас барсан байна.
Гэмт хэргийн улмаас 2 хүний эрүүл мэндэд хөнгөн, 11 хүний эрүүл мэндэд хүндэвтэр, 8 хүний эрүүл мэндэд хүнд хохирол учраад байгаа юм.
Гэмт хэрэг үйлдсэн хүүхдүүд насны хувьд:
15 настай-1,
16 настай-5,
17 настай-18,
хүйсийн хувьд бүгд эрэгтэй байна.
Дээрх хүүхдүүдээс 3 нь мотоцикл, 21 нь автомашин жолоодож замын хөдөлгөөнд оролцож байхдаа осол гаргаснаас нэг нь согтууруулах ундааны зүйл хэрэглэсэн байжээ.
Шүүхээс 5 хүүхдэд хорих ял, 2 хүүхдэд зорчих эрх хязгаарлах ял, 11 хүүхдэд ял оногдуулахгүйгээр тэнсэж, зан үйлээ засах хүмүүжлийн чанартай албадлагын арга хэмжээ авсан бол 4 хүүхдийг эрүүгийн хариуцлагаас чөлөөлжээ.
Одоо хоёр хэрэг шүүхийн шатанд хянагдаж байна.
Замын хөдөлгөөний аюулгүй байдлын тухай хуульд зааснаар 18 насанд хүрсэн, тухайн ангиллын тээврийн хэрэгсэл жолоодох эрх бүхий шалгалтад тэнцсэн, жолоодох эрхийн үнэмлэхтэй иргэн тээврийн хэрэгсэл жолоодон хөдөлгөөнд оролцох эрхтэй.
Эцэг эхчүүд та бүхэн тээврийн хэрэгслийн түлхүүрээ ил задгай тавихгүй байх, хүүхдэдээ тавих хараа хяналтаа сайжруулж, жолоодох эрхгүйгээр тээврийн хэрэгсэл жолоодсоноос үүсэж болох хор уршиг, эрх зүйн үр дагаврын талаар хүүхдүүдээ ойлголт өгч, болзошгүй эрсдэлээс урьдчилан сэргийлэхийг прокурорын байгууллагаас зөвлөж байна.
Сэтгэгдэл бичих