Хэнтий аймгийн Цэнхэрмандал сумын Согоот багийн нутагт орших Хар Зүрхний Хөх нуурын Зүрх хайрханд төрийн тахилга хүндэтгэлийн ёслол боллоо.
Их Монгол Улс байгуулагдсаны 820 жилийн ойг тохиолдуулан Монгол Улсын Ерөнхийлөгчийн 2026 оны хоёрдугаар сарын 23-ны өдрийн зарлигаар Хар зүрх уулыг төрийн тахилгат хайрхан болгосон юм.
Хар зүрхний Хөх нуур нь уулсаар хүрээлэгдсэн, амьтан, ургамлын төрөл зүйлээр баялаг, байгалийн үзэсгэлэнт газар юм. Түүхэн сурвалжид 1189 оны шарагчин тахиа жил энэ нутагт Тэмүүжинг Хамаг Монголын хан сууринд залсан тухай тэмдэглэдэг. Мөн “Монголын нууц товчоо”-нд Хөх нуур, Хар зүрх уул, Сэнгүр горхи хэмээх газар нутгийн нэрс гардаг байна.
Нуурын эрэг дээр Чингис хааны мэндэлсний 840 жилийн ойд зориулан босгосон хөшөө бий агаад түүнийг тойруулан 108 метр голчтой хагас саран хэлбэртэй талбайд Монголын төрийг барьсан Алтан ургийн их бага 36 хаадын модон сийлбэр байрлуулсан байдаг. Эдгээрийн төв хэсэгт Чингис хаан, түүний эцэг Есүхэй, хатан эх Өэлүн, төрийн их хатан Бөртэ Үжиний сийлбэрийг байрлуулсан бөгөөд энэхүү цогцолборт нийт 50 ширхэг модон сийлбэр байдаг байна.
Ийнхүү төрийн тахилгат хайрхан болсон Хар зүрх уулын анхны төрийн тахилга өнөөдөр болж байгаа нь онцлог юм. Төрийн тахилгын үеэр уулын тэнгэрийг тайх уламжлалт ёслолыг үйлдэж, төрийн төлөөлөл, нутгийн иргэд оролцож байна.
Эх сурвалж: Хэнтий аймгийн ЗДТГ
Сэтгэгдэл бичих