-ЗОЧИД БУУДАЛ БАРИХ ЗУРАГ ТӨСӨЛ СОЛОНГОС УЛСАД ХИЙГДЖЭЭ-
“Дархан-Уул аймгийн хүүхдийн паркийн 15 га газарт нь казино, зочид буудал барих гэж байгаа тухай мэдээлэл ирсэн билээ.
Уншигч таны харж байгаа зураг дээрх Дархан-Уул аймгийн “Миний монгол” хүүхдийн цэцэрлэг хүрээлэн юм. Аймгийнхаа төвд байрлах хамгийн том хүүхдийн талбай бөгөөд ногоон байгууламж бүрдсэн хүлээлэн аж. Энэ л газар олон жилийн турш Дарханчууд тоглож нарлан суудаг байсан. Гэтэл аймгийн засаг дарга болон ИТХ-ынхан тусгай хамгаалалттай газраас гаргах замаар хувьд шилжүүлэн газрыг зарж улмаар зочид буудал бүхий цогцолбор барихаар төлөвлөж ажилдаа оржээ.
Учир байдлыг тодруулбаас, Дарханы Хүүхдийн паркыг 1972 онд Дарханчууд өөрсдөө босгон тохижуулсан байгаа юм. “Миний Монгол” цэцэрлэгт хүрээлэн нь 45,5 га газартай аж. Үүнийг Дархан-Уул аймгийн ИТХ-ын 2008 оны хоёрдугаар сарын 28-ы өдрийн 10/03 дугаар бүхий Орон нутгийн тусгай хамгаалалтанд авах тухай тогтоолоор тусгай хамгаалалтанд авч байж.
Үүнийг саяхан 2019 оны дөрөвдүгээр сарын 02-ы өдрийн ИТХ-ын “Тогтоолд өөрчлөлт оруулах тухай” тогтоолоор “Миний монгол цэцэрлэгт хүрээлэнд хүүхдийн тоглоомын талбай, соёл амралтын цогцолбор байгуулах болсонтой холбогдуулан, аймгийн ИТХ-ын 2018 оны орон нутгийн тусгай хамгаалалтанд авах тухай 10/03 дугаар тогтоолоор батлагдсан “Миний Монгол” цэцэрлэгт хүрээлэнтэй холбогдох тусгай хамгаалалттай бүс нутаг, миний монгол цэцэрлэгт хүрээлэнгийн тусгай хамгаалалтанд авсан нийт 44,5 га газраас 8,4 га газрыг орон нутгийн тусгай хамгаалалтаас гаргасугай” хэмээх тогтоол гаргаж шийдвэрлэжээ.
Ингэснээр тус аймгийн паркийн 44.5 га газрын тал нь буюу 23.4 га-г орон нутгийн удирдлагууд бусдад эзэмшүүлэх шийдвэр гаргаж улмаар хууль бусаар хүүхдийн тоглоомын талбайг эрх мэдлээ ашиглан заржээ. Хүүхдийн тоглох талбайд казино, зочид буудал бүхий цэнгээний газар сүндэрлэхээр зураг төсөл нь Солонгос улсад өндөр үнээр хийгдсэн байна. Дархан аймгийн удирдлагууд менежментийн хувьчлал зарлаж хүүхдийн зориулалттай газрыг зарсан бөгөөд нутгийг иргэдийг эсэргүүцэлтэй тулж улмаар хүчингүй болоод ахин хувьчлал зарлан 8,4 га газрыг зарах гэж байгаа аж.
-ДАРХАНЫ ТӨРИЙН БУС БАЙГУУЛЛАГЫН ТӨЛӨӨЛӨЛ БОЛОН ИРГЭД ЭСЭРГҮҮЦЭЖ БАЙНА-
Энэ талаар Дарханы залуучууд эсэргүүцэл илэрхийлж, шүүхэд хандсан байна. Гэвч ИТХ нь хууль бус шийдвэрээ өөрчлөхөөр дөрөвдүгээр сарын 20-нд хуралдахдаа орон нутгийн тусгай хамгаалалттай газар нутгийн хэмжээг өөрчлөх тухай мөн л хууль бус шийдвэр гаргажээ.
Түүнээс гадна паркийн мөн 15 га газарт казино, зочид буудал, үйлчилгээний газар, хороолол бүхий “Darkhan PMP” төсөл явж байгаа талаар иргэнээс мэдээлэл ирсэн байна. Энэ төслийн зураг төсөл нь бэлэн болчихсон бөгөөд судалж үзэхэд БНСУ-ын Сөүл хотод байрлалтай, маш өндөр үнээр ажил гүйцэтгэдэг зураг төслийн компаниар хийлгэсэн нь нотлогджээ.
Тиймээс Дарханчууд нэгдэн энэ талаарх мэдээллийг АТГ-т өгсөн бөгөөд Дархан-Уул аймгийн удирдлагууд болон сонгогдсон УИХ-ын гишүүд үүнд холбоотой эсэх талаар тайлбар өгөхийг мэдэгдэхийг шаардаж эхэлжээ.
Дархан-Уул аймгийн залуучуудын төлөөлөл хэлэхдээ: “Дарханы парк намайг бага байхад байсан тоглоомуудтайгаа л байгаа. Аймгийн удирдлагууд ирээдүй болсон хүүхэд залуустаа зориулж, хамтраад нэг тоглоом ч нэмээгүй, ядаж номын сан бариагүй байж тэдний муу зүйлд уруу татах казино байгуулах гэж газар олгож байгаа нь харамсалтай. Хэн нэгэн Засаг дарга, хэн нэгэн 76 бидний эрх ашгийг хамгаалахгүй тул залуучууд бид дугарах хэрэгтэй. Хэрэв нэгэнт зөвшөөрөл өгөөд төсөл эхэлчихвэл сүүлд нь мянга яриад, орилоод нэмэргүй гэдгийг Улаанбаатар хотын паркийн газрын жишээ харуулж байна. Тиймээс бид үүний эсрэг тэмцэнэ” гэсэн юм.
Эх сурвалж: Medee.mn
Сэтгэгдэл бичих