Иран улс гал зогсоох тохиролцооны хүрээнд стратегийн чухал гарц болох Ормузын хоолой-г түр хугацаанд нээх шийдвэр гаргаснаа мэдэгдлээ. Энэ талаар Ираны Гадаад хэргийн сайд Аббас Арагчи X нийгмийн сүлжээнд нийтэлсэн байна.
Тэрбээр “Хоёр долоо хоногийн хугацаанд Ираны Зэвсэгт хүчинтэй хамтран зохицуулалт хийж, техникийн хязгаарлалтыг харгалзан үзсэний үндсэн дээр Ормузын хоолойгоор аюулгүй нэвтрэх боломжийг нээнэ” хэмээн мэдэгджээ. Энэхүү шийдвэр нь бүс нутгийн хурцадмал байдлыг намжаах, олон улсын тээвэр, тэр дундаа нефтийн нийлүүлэлтийг тогтворжуулах зорилготой гэж ажиглагчид үзэж байна.
Үүнээс өмнө АНУ-ын Ерөнхийлөгч Дональд Трамп хоёр улсын хооронд хоёр долоо хоногийн хугацаанд гал зогсоох тохиролцоонд хүрсэн талаар мэдэгдсэн юм. Түүний хэлснээр, АНУ-ын тал Иранаас 10 зүйл бүхий санал хүлээн авсан бөгөөд үүнийг цаашдын хэлэлцээний үндэс суурь гэж үзэж байгаа аж.
Харин Ираны Үндэсний аюулгүй байдлын дээд зөвлөл мэдэгдэлдээ АНУ-тай хийсэн дайнд “ялалт байгуулсан” гэж онцолж, Вашингтон Ираны тавьсан зарим гол шаардлагыг хүлээн зөвшөөрсөн хэмээн мэдээлжээ. Үүнд Ормузын хоолойн хяналтыг Иранд үлдээх, эдийн засгийн хоригийг цуцлах, ураны баяжуулалтыг үргэлжлүүлэх боломж олгох, мөн бүс нутгаас цэргээ татах зэрэг асуудал багтсан байна.
Талуудын хоорондох шууд хэлэлцээ Исламабад хотод дөрөвдүгээр сарын 10-ны өдөр эхлэхээр товлогдсон бөгөөд Ираны тал уг яриа хэлэлцээг хоёр долоо хоногийн хугацаанд багтаан явуулахаар төлөвлөжээ. Энэ хугацаанд гал зогсоох тохиролцоо хүчин төгөлдөр үйлчилнэ.
Гэсэн хэдий ч Ираны тал энэхүү хэлэлцээ нь АНУ-тай хийж буй зөрчилдөөний эцсийн шийдэл биш гэдгийг онцолж, цаашдын үйл явц тодорхойгүй хэвээр байгааг дурдсан байна. Шинжээчдийн үзэж буйгаар, Ормузын хоолойг түр хугацаанд нээх шийдвэр нь дэлхийн нефтийн зах зээлд богино хугацаанд эерэг нөлөө үзүүлэх ч урт хугацаанд тогтвортой байдал хангагдах эсэх нь хэлэлцээний үр дүнгээс шууд хамаарах юм.
Сэтгэгдэл бичих