Ойн тухай хуульд зааснаар “түймрийн аюултай үе” нь тухайн нутаг дэвсгэрт ой, хээрийн түймэр гарах нөхцөл бүрдсэн хуурайшилт бүхий хугацааг хэлдэг бөгөөд жил бүрийн гуравдугаар сарын 20-ноос зургаадугаар сарын 10-ныг хүртэл үргэлжилдэг.
Хаврын улирлын ой, хээрийн гал түймрийн аюулын үнэлгээгээр улсын нийт нутгийн 0.47 хувь нь маш их, 3.06 хувь нь их, 8.07 хувь нь дунд түвшний аюултай ангилалд багтаж байна.
Онцгой байдлын байгууллагын мэдээлснээр, сүүлийн өдрүүдэд хэд хэдэн аймагт ой, хээрийн гал түймэр гарч, заримыг нь унтраагаад байна.
Сэлэнгэ аймгийн Хүдэр сумын Тарвагатай багийн “Шоргоолж” гэдэг газарт гарсан ой, хээрийн гал түймрийн дуудлагыг гуравдугаар сарын 23-ны 13:20 цагт хүлээн авч, холбогдох алба хаагчид шуурхай ажиллан мөн өдрийн 22:26 цагт цурамд оруулж, гуравдугаар сарын 24-ний 11:20 цагт бүрэн унтраасан байна. Урьдчилсан байдлаар 6 га талбай өртөж шатжээ.
Хөвсгөл аймгийн Түнэл сумын Зуны гол багийн “Бага-Өлийн дэлэн” гэдэг газарт гарсан ой, хээрийн гал түймрийн дуудлагыг гуравдугаар сарын 24-ний 19:00 цагт хүлээн авч, нийт 58 хүн, 4 автомашинтайгаар унтраах ажиллагааг зохион байгуулан ажиллаж байна. Урьдчилсан байдлаар 9 га талбай өртөөд байна.
Ховд аймгийн Дөргөн сумын Агваш багийн “Дэнж” гэдэг газарт, Дөргөн нуурын аралд гарсан хээрийн гал түймрийг гуравдугаар сарын 25-ны 04:00 цагт бүрэн унтраасан бөгөөд 30 хүн, 4 автомашинтайгаар ажилласан байна.
Мөн Сүхбаатар аймгийн Эрдэнэцагаан сумын “Шахайн ширээ” гэдэг газарт гарсан хээрийн гал түймрийг гуравдугаар сарын 24-ний өдөр цурамд оруулсан бөгөөд урьдчилсан байдлаар 3600 га талбай шатжээ.
Сүхбаатар аймгийн Түмэнцогт сумын “Жавхлант” гэдэг газарт гарсан хээрийн гал түймрийг мөн өдөр бүрэн унтраасан бөгөөд 300 га талбай өртсөн байна.
Онцгой байдлын байгууллагаас иргэдийг ой, хээрийн бүсэд ил задгай гал гаргахгүй байх, асаасан гал, үнс нурмыг бүрэн унтраах, хариуцлагагүй үйлдлээс зайлсхийхийг анхааруулж байна.
Сэтгэгдэл бичих