Дулаан, цахилгаан үйлдвэрлэгч, түгээгчдийн Үйлдвэрчний эвлэлийн холбооноос эрчим хүчний салбарын ажилтнууд ажил хаялт зарлаж байгаагаа албан ёсоор мэдэгдлээ.
Тус холбооны дарга Э.Адъяасүрэн “Эрчим хүчний салбарын ажилтнуудын цалин хөлс нь хийж буй хөдөлмөр, хүнд нөхцөлдөө нийцэхгүй байна. Хүний нөөцийн хөгжил, хөдөлмөрийн аюулгүй байдал, эрүүл ахуйн нөхцөл хангалтгүй, техник технологийн шинэчлэл, хөрөнгө оруулалт орхигдсон” хэмээн мэдэгдэв.
Тэрбээр 2026–2027 оны хамтын хэлэлцээрийг 2025 оны арванхоёрдугаар сард эхлүүлж, таван удаагийн уулзалт хийсэн ч тодорхой асуудлуудаар тохиролцоонд хүрээгүй тул сонирхлын маргаан үүсч, хуулийн хугацаанд шийдэлд хүрээгүй учраас ажил хаях нөхцөл бүрдсэн гэж тайлбарлав.
Станцуудын нөхцөл байдал
“ДЦС-4”-ийн Үйлдвэрчний эвлэлийн хорооны дарга Ган-Эрдэнэ:
“Манай станц төвийн бүсийн эрчим хүчний 60 орчим хувийг үйлдвэрлэдэг. Өвлийн ачааллын үед доголдол гарахад ажилтнууд 60-70 хэмийн халуунд шууд орж ажилладаг. Заримдаа хамгаалалтын каск хүртэл хайлах халуун нөхцөлд гэмтэл засдаг” хэмээн онцлов.
Тэрбээр ажилтнуудын цалин хөлсийг нэмэгдүүлэх шаардлага тулгамдсан асуудал болоод байгааг дурдсан юм.
Үйлдвэрчний эвлэлийн шаардлага
Эрчим хүчний салбарынхан:
-
Цалин хөлсийг 30 ба түүнээс дээш хувиар нэмэгдүүлэх
-
Хөдөлмөрийн хөлсний доод хэмжээг өсгөх
-
Цагийн тариф, итгэлцүүрийн тогтолцоог өөрчлөх
зэрэг нийт 12 шаардлага тавьжээ.
Гэвч Эрчим хүчний яамнаас цалин нэмэх боломжгүй гэсэн байр суурийг удаа дараа илэрхийлсэн тул хэлэлцээр зогсонги байдалд орсон байна.
Нөхцөл байдал
-
Хэлэлцээр: 5 удаа хийгдсэн
-
Тохиролцоо: хүрээгүй
-
Үйлдвэрчний эвлэлийн гишүүдийн 80 хувь нь ажил хаялтыг дэмжиж гарын үсэг зурсан
Ийнхүү эрчим хүчний салбарынхан хуулиар олгогдсон эрхийн хүрээнд ажил хаялт зарлахаар болсон бөгөөд энэ нь эрчим хүчний хангамжид тодорхой эрсдэл дагуулах магадлалтай байна.
Сэтгэгдэл бичих