“Аялал жуулчлалын 7 хоног -2026” үндэсний чуулганы хоёр дахь өдөр “Аялал жуулчлалын академи” өдөрлөгөөр үргэлжилж байна.
Өдөрлөгт олон улсын болон дотоодын сонирхолтой, туршлагатай илтгэгчид оролцож, тогтвортой аялал жуулчлалын бодлого, чиг хандлага, манай улсын боломжийг ярилцлаа. Тухайлбал, НҮБ-ын аялал жуулчлалын байгууллагын төлөөлөгч, Японы ЖАЙКА-гийн зөвлөх, олон улсын судлаач, дипломат болон Монголын мэргэжилтнүүд тогтвортой аялал жуулчлал, дэлхийн чиг хандлага, “Best Tourism Villages by UN Tourism” санаачилга, олон улсын зах зээлд өрсөлдөх боломжийг хэлэлцэж байна. Мөн дипломат ёс зүй, палео-аялал жуулчлал, бизнесийн туршлага зэрэг сонирхолтой сэдэв хөтөлбөрт багтжээ. Ийнхүү мэдлэг, туршлага солилцохоос гадна Монголын аялал жуулчлалын салбарт шинэ санаа, хамтын ажиллагааг бий болгох хэлэлцүүлэг өрнүүлнэ.
Өдөрлөгийн үеэр “ЖАЙКА” байгууллага “Тогтвортой аялал жуулчлалыг хөгжүүлэх” төслийн хүрээнд Дархан-Уул, Сэлэнгэ, Төв, Өмнөговь аймагтай хамтран ажиллах санамж бичигт ССАЖЗЯ-ны Аялал жуулчлалын бодлого зохицуулалтын газрын дарга В.Батчимэг, “Тогтвортой аялал жуулчлалыг хөгжүүлэх” төслийн зөвлөх Макино Такахико, Өмнөговь аймгийн СУАЖЗГ-ын дарга Т.Мөнгөнтуул, Төв аймгийн СУАЖЗГ-ын дарга Б.Тунгалаг, Дархан-Уул аймгийн СУАЖЗГ-ын дарга Х.Соёл-Эрдэнэ, Сэлэнгэ аймгийн СУАЖЗГ-ын дарга С.Баасанжаргал нар гарын үсэг зурав. Ингэснээр Монголд тогтвортой аялал жуулчлалыг хөгжүүлэх, орон нутгийн аялал жуулчлалын байгууллагын чадавхыг бэхжүүлэх, олон улсын сайн туршлага, стандартыг нэвтрүүлэх, аялал жуулчлалын бүтээгдэхүүн, үйлчилгээний чанарыг сайжруулж, хамтын ажиллагааг өргөжүүлэх ажээ.
Үндэсний чуулган нь аялал жуулчлалын салбарын бодлого, тогтвортой хөгжил, өсөлтийг хангах, байгальд ээлтэй бодлогыг уялдуулах, олон улсын зах зээлд өрсөлдөх чадварыг нэмэх чиглэлээр мэдээлэл хүргэж, төр, хувийн хэвшлийн хамтын ажиллагааг бэхжүүлэх зорилготой юм.
Сэтгэгдэл бичих