Ираны Ерөнхийлөгч Masoud Pezeshkian төрийн телевизээр хийсэн мэдэгдэлдээ тус улсын зүгээс хөрш орнууд руу чиглэсэн довтолгооны асуудалд харамсаж байгаагаа илэрхийлж, уучлал хүссэн байна.
Тэрбээр мэдэгдэлдээ “Дайралтад өртсөн хөрш орнуудаасаа бид уучлалт хүсэх ёстой. Манай удирдагчид, командлагчид, шавь нар маань дайсны ширүүн довтолгооны улмаас амь үрэгдсэн. Манай зэвсэгт хүчин улс орныхоо газар нутгийн бүрэн бүтэн байдлыг хамгаалахын тулд өөрсдийгөө золиослоход бэлэн байна” гэж онцолжээ.
Мөн тэрбээр командлагчид амь үрэгдсэн нөхцөлд зэвсэгт хүчнийхэн газар нутгаа хамгаалах үүргээ бие даан гүйцэтгэсэн гэдгийг дурдсан байна.
“Бид хөрш орнууд руугаа довтлохоор төлөвлөөгүй. Тэд бол бидний ахан дүүс. Бид бүс нутагт энх тайван, тогтвортой байдлыг хамтран бий болгохыг хүсэж байна” хэмээн Ерөнхийлөгч хэлжээ.
Түүнчлэн Ираны Түр удирдагчдын зөвлөлөөс “хөрш орнууд Иран руу довтлоогүй тохиолдолд цаашид цохилтын бай болгох ёсгүй” гэсэн шийдвэр гаргасан талаар тэр мэдээлсэн байна. Иймд үүссэн нөхцөл байдлыг дипломат замаар шийдвэрлэх шаардлагатай гэдгийг онцлон тэмдэглэжээ.
Үүний зэрэгцээ Ираны эрх баригчид нийслэл Техранд төрийн байгууллагуудын үйл ажиллагааг хэсэгчлэн сэргээж эхэлснийг өмнө нь мэдээлсэн байна.
Сэтгэгдэл бичих