Цөмийн материал агуулаагүй устөрөгчийг ашиглан химийн хүчтэй гинжин урвал үүсгэдэг тэсрэх төхөөрөмжийг Хятадын эрдэмтэд амжилттай туршсан тухай South China Morning Post сонинд мэдээлжээ.
Тус сонинд бичсэнээр, 2 кг жинтэй уг бөмбөг дэлбэрсний дараа 1000-аас дээш хэмийн халуун галт бөмбөлөг үүсгэж, хоёр гаруй секундийн хугацаанд үргэлжилсэн нь тротил гэдэг тэсрэх бодисын дэлбэрэлттэй харьцуулахад 15 дахин урт хугацаа ажээ.
Төхөөрөмжийг Хятадын төрийн өмчит хөлөг онгоцны үйлдвэрлэлийн корпорацын (CSSC) харьяа 705 дугаар шинжлэх ухааны хүрээлэнд бүтээжээ. Тус хүрээлэн усан доорх зэвсгийн системийг голлон хөгжүүлдэг байгууллага юм. Энэхүү төхөөрөмжид даралтат баллонтой харьцуулахад устөрөгчийг хамаагүй их хэмжээгээр тогтоон барьдаг магнийн гидрид хэмээх химийн нэгдлийг ашигласан байна. Зохион бүтээгчдийн ярьснаар, тэсрэх төхөөрөмжийн дэлбэрэлтийн хүчийг нарийн тохируулдаг тул өргөн хэмжээний газар нутаг дээрх байнуудыг зэрэг устгах боломжтой.
Д.Жаргал
Эх сурвалж: “Монцамэ” агентлаг
Сэтгэгдэл бичих