ОБЕГ, БХБЯ, МХЕГ болон Улаанбаатар хотын Захирагчийн ажлын албанаас ‘Газар хөдлөлтийн аюулаас урьдчилан сэргийлэх, таниулах өдөр’-ийн талаар мэдээлэл хийлээ.
Мэргэжлийн хяналтын ерөнхий газрын дэд бүтцийн хяналтын газрын дарга Д.Жаргал ‘Улсын хэмжээнд нийт 130 мянган барилга байдгаас Улаанбаатар хотод 117 мянга орчим нь бий. Нийт барилгын 13.1 буюу 17 мянган барилгын газар хөдлөлтийн тэсвэржилт буурсан гэсэн судалгаа гарсан. Иймд олон хүн цуглардаг үзвэр үйлчилгээний газрууд, орон сууцны барилгуудын төлөв байдлыг яаралтай тогтоох шаардлагатай.
Улсын хэмжээнд 5400 орон сууц ашиглагдаж байна. Үүнээс Улаанбаатар хотын 340 орон сууцыг ашиглах боломжгүй, насжилт хэтэрсэн, засвар үйлчилгээ хийх шаардлагатайгэж тодорхойлсон. Тиймээс эдгээр орон сууцны 68-ийг нь ашиглахыг зогсоож бусдад засвар үйлчилгээ хийгдэж байна.
Барилгын салбарт өнөөдрийн байдлаар газар хөдлөлийн чиглэлээр 17 дүрэм журам хүчин төгөлдөр хэрэгжиж байна. Барилгын салбарын норм нормативын баримт бичгийн 2022 оны төлөвлөгөөнд 8 төрлийн баримт бичгийг шинээр болон шинэчилсэн байдлаар боловсруулахаар төлөвлөсөн.
Монгол Улсын нийт нутаг дэвсгэрийн 66 хувь нь газар хөдлөлтийн долоо, найм, есөн баллын бүсэд байдаг. Мөн Улаанбаатар хотын 98 хувь нь долоо, найм баллын газар хөдлөлтийн бүсэд хамаардаг. Үүнийг хувиар авч үзвэл нийслэлийн нутаг дэвсгэрийн 47 хувь нь долоо балл, 50 хувь нь найм, хоёр хувь нь ес нь баллд хамаарч байна.
Өнөөдрийн байдлаар 12 аймгийн газар хөдлөлтийн бичил мужлалын газрыг хийгээд байна. Үлдсэн 9 аймагт газар хөдлөлтийн бичил мужлалын газрыг хийхэд 1.6 тэрбум төгрөг шаардлагатай. Энэ талаар холбогдох албанд хандсан боловч одоогоор шийдэж өгөөгүй.
2002 оноос хойш баригдсан олон нийтийн зориулалттай 3261 барилга бий. Үүний 1119 нь нийслэлд 2142 нь орон нутагт байна. Эдгээрийг бүрэн паспортжуулахад 22.8 тэрбум төгрөг шаардлагатай.
Шинээр баригдаж буй барилгуудад газар хөдлөлтийн эсрэг арга хэмжээ хангалттай аваагүй тохиолдол хяналт шалгалтаар явахад илэрч байна. Энэ нь даацын элементүүдийг ашиглахдаа нүхлэх, зориудаар хэв дүрсийг нь өөрчлөх явдал гарч байгаатай холбоотой’ гэлээ.
Сэтгэгдэл бичих