Ерөнхийлөгч дэгийн тухай хуульд өөрчлөлт оруулах төсөл санаачилсныг Засгийн газар дэмжжээ

Засгийн газар сая ээлжит бусаар хуралдлаа. Ингэхдээ УИХ-ын тухай болон УИХ-ын чуулганы хуралдааны дэгийн тухай хуульд өөрчлөлт оруулах асуудлыг хэлэлцжээ. Учир нь, Монгол Улсын Ерөнхийлөгч Х.Баттулга дээрх хоёр хуульд өөрчлөлт оруулах тухай хуулийн төсөл боловсруулж Засгийн газраас саналыг нь авахаар илгээсэн юм байна. Тодруулбал, “УИХ-ын даргыг огцруулах асуудлаар нийт гишүүдийн олонх нь санал гаргасан тохиолдолд УИХ хэлэлцэн шийдвэрлэнэ” гэсэн заалт оруулахаар төсөл санаачилжээ. Уг төслийг нь Засгийн газар хэлэлцээд дэмжих нь зүйтэй гэж үзсэн байна. Тиймээс Ерөнхийлөгч энэхүү төслөө ойрын хугацаанд өргөн барих бололтой.