Дэлхийн хөгжиж буй орнуудын судлаач эмэгтэйчүүдийн байгууллага /OWSD/-аас жил бүр шилдэг эмэгтэй судлаачдад олгодог ‘OWSD-Elsevier Foundation Award’ шагналыг энэ жил Монголын математикч хүртжээ.
OWSD нь 1993 оноос эхэлж дэлхийн өнцөг булан бүрээс ирсэн мэргэжил нэгтнүүдтэй холбоо тогтоож, хамтын ажиллагааны сүлжээ бий болгон семинарт оролцож, салбарынхаа мэргэжилтнүүдтэй уулзах, орон нутгийн лаборатори, байгууллагуудад зочлон туршлага судлах боломжуудыг олгодог олон улсын байгууллага юм.
Уг шагналыг 2012 оноос эхлэн эмэгтэй эрдэмтдийн шинжлэх ухааныг хөгжүүлэхэд оруулсан хувь нэмрийг үнэлж олгож эхэлсэн бөгөөд Латин Америк ба Карибын тэнгис, Зүүн ба Зүүн Өмнөд Ази, Номхон далайн бүс нутаг, Төв ба Өмнөд Ази, Арабын бүс нутаг, Сахар орчим ба Африкийн гэсэн таван бүс нутгаас тус бүр нэг судлаачийг шалгаруулдаг байна. Нийт 81 хөгжиж буй орны судлаачдаас Зүүн ба Зүүн Өмнөд Ази, Номхон далайн бүс нутгийн шилдэг судлаачаар математикийн шинжлэх ухааны доктор Доржготовын Хонгорзул шалгарчээ. Уг шагналыг 5000 ам.доллар дагалддаг бөгөөд жил бүрийн хоёрдугаар сард АНУ-д зохион байгуулдаг Америкийн Шинжлэх ухааныг дэмжих нийгэмлэгийн /AAAS/ хуралд оролцох эрхтэй болдог байна.
Д.Хонгорзул математикч мэргэжилтэй, шинжлэх ухаан, инженерийн салбарын хэрэглээний болон онолын математикийн салбар болох бутархай дифференциал тэгшитгэл /FDE/ -ийг судалдаг эрдэмтэн юм байна. FDE нь физик, хими, биологи, эдийн засаг зэрэг олон хэрэглээний шинжлэх ухааны нарийн төвөгтэй систем, үйл явцыг дүрслэн харуулахад ашиглагддаг аж. Тэрбээр хэрэглээний математикийн чиглэлээр МУИС-ийг төгсөж, магистр хамгаалжээ. Дараа нь Японы засгийн газрын тэтгэлгээр Кюүшюгийн их сургуульд докторын зэрэг хамгаалсан бөгөөд эх орондоо эргэж ирээд 2018 оноос МУИС-д багшилж байгаа аж.
Сэтгэгдэл бичих